హైదరాబాద్, జనవరి 30: నగరంలో మహిళలు మరియు బాలికల రక్షణే పరమావధిగా, వారి పట్ల మరింత సున్నితంగా, బాధ్యతాయుతంగా వ్యవహరించేలా షీ టీమ్స్ (SHE Teams) సిబ్బందికి ప్రత్యేక ‘రిఫ్రెషర్ కోర్స్’ శిక్షణ కార్యక్రమం నిర్వహించారు. హైదరాబాద్ పోలీస్ కమిషనర్ శ్రీ వి.సి. సజ్జనార్, ఐపీఎస్ మరియు అడిషనల్ కమిషనర్ (క్రైమ్స్ & ఎస్ఐటీ) శ్రీ ఎం. శ్రీనివాస్, ఐపీఎస్ గారి మార్గదర్శకత్వంలో ఉమెన్ సేఫ్టీ వింగ్ ఆధ్వర్యంలో ఈ కార్యక్రమం జరిగింది.
మహిళా కోణంలో విధులు నిర్వహించాలి: అడిషనల్ సీపీ
ఈ సందర్భంగా అడిషనల్ కమిషనర్ శ్రీ ఎం. శ్రీనివాస్ మాట్లాడుతూ, షీ టీమ్స్ సిబ్బంది బాధితులతో మాట్లాడేటప్పుడు సానుభూతితో, మానవీయ కోణంలో వ్యవహరించాలని సూచించారు. చట్టపరమైన చర్యలు తీసుకుంటూనే, బాధితులకు మానసిక ధైర్యాన్ని, భరోసాను కల్పించాలని ఆయన స్పష్టం చేశారు. మహిళల గౌరవానికి భంగం కలగకుండా చూస్తూ, ప్రజల్లో మహిళా రక్షణ వ్యవస్థపై నమ్మకాన్ని మరింత పెంచాలని ఆయన పిలుపునిచ్చారు.
నైపుణ్యాల పెంపుపై ప్రత్యేక దృష్టి: డీసీపీ లావణ్య
ఉమెన్ సేఫ్టీ వింగ్ డీసీపీ శ్రీమతి డాక్టర్ లావణ్య ఎన్.జె.పి. మాట్లాడుతూ, సిబ్బంది యొక్క వృత్తిపరమైన నైపుణ్యాలను మెరుగుపరచడమే ఈ శిక్షణ ప్రధాన ఉద్దేశమని తెలిపారు. కొత్త చట్టాలు (BNS), సాంకేతిక పరిజ్ఞాన వినియోగం, బాధితుల పట్ల అనుసరించాల్సిన విధానాలు మరియు క్షేత్రస్థాయిలో ఎదురయ్యే సవాళ్లను ఎలా ఎదుర్కోవాలో సిబ్బందికి వివరించారు. ఈ శిక్షణలో సైబర్ నిపుణులు, న్యాయ నిపుణులు మరియు అనుభవజ్ఞులైన రిటైర్డ్ పోలీస్ అధికారులు సిబ్బందికి అవగాహన కల్పించారు.
ముఖ్యమైన అంశాలు మరియు శిక్షణ:
• చట్టపరమైన అవగాహన: భారతీయ న్యాయ సంహిత (BNS) మరియు ప్రత్యేక చట్టాలపై లోతైన అవగాహన.
• సాంకేతికత: సైబర్ నేరాలు, షీ పోర్టల్ నిర్వహణ మరియు సాంకేతిక పరికరాల వాడకం.
• క్షేత్రస్థాయి ఆపరేషన్లు: రెడ్ హ్యాండెడ్గా పట్టుకోవడం మరియు డెకాయ్ (Decoy) ఆపరేషన్ల నిర్వహణపై శిక్షణ.
• సాఫ్ట్ స్కిల్స్: బాధితులతో సంభాషించే విధానం మరియు ఆత్మరక్షణ మెళకువలు.
షీ టీమ్స్ సూచనలు (SHE Teams Alerts):
మహిళల రక్షణ కోసం షీ టీమ్స్ ఈ క్రింది సూచనలు జారీ చేసినారు:
• సురక్షిత ప్రయాణం: ప్రయాణ సమయంలో అప్రమత్తంగా ఉండాలి. నిర్మానుష్య ప్రాంతాలకు వెళ్లకూడదు. ప్రయాణ వివరాలను సన్నిహితులకు షేర్ చేయాలి.
• నకిలీ ప్రొఫైల్స్: సోషల్ మీడియాలో అపరిచితుల పట్ల జాగ్రత్తగా ఉండాలి. వారి గుర్తింపును నిర్ధారించుకున్నాకే సంభాషించాలి.
• వ్యక్తిగత సమాచారం: వ్యక్తిగత వివరాలను సామాజిక మాధ్యమాల్లో అతిగా పంచుకోవద్దు. ఇది గుర్తింపు దొంగతనానికి (Identity Theft) దారి తీయవచ్చు.
• ఖాతాల భద్రత: సోషల్ మీడియా ఖాతాలకు బలమైన పాస్వర్డ్లు మరియు ‘టూ-ఫ్యాక్టర్ అథెంటికేషన్’ పెట్టుకోవాలి.
• మౌనంగా ఉండకండి: వేధింపులు ఎదురైనప్పుడు మౌనంగా ఉండటం నేరస్థుడికి బలాన్నిస్తుంది. వెంటనే ఫిర్యాదు చేయడం ద్వారా తదుపరి నేరాలను అరికట్టవచ్చు.
సహాయం కోసం సంప్రదించండి: ఏవైనా వేధింపులు ఎదురైనా లేదా గమనించినా వెంటనే Dial 100 కి కాల్ చేయండి లేదా 9490616555 వాట్సాప్ నంబర్కు ఫిర్యాదు చేయండి. మీ వివరాలు అత్యంత గోప్యంగా ఉంచబడతాయి.
