హైదరాబాద్: కొరియన్ సంస్కృతి, సంగీతం, కళలు, సంప్రదాయాల సమ్మేళనంగా ‘కొరియా కల్చర్ డే 2026’ నగరంలో సందడిగా జరిగింది. ‘కె-హార్మనీ ఫెస్టా’ పేరుతో, ‘వన్ లైట్, టూ సిటీస్’ అనే ఇతివృత్తంతో అక్టోబర్ 25న హైటెక్ సిటీలోని శిల్పకళా వేదికలో ఈ వేడుకను నిర్వహించారు.
ఈ కార్యక్రమంలో కొరియన్ సంస్కృతికి ప్రతీకగా నిలిచే సంగీత, వినోద ప్రదర్శనలు ప్రేక్షకులను ఆకట్టుకున్నాయి. కొరియన్ కళాకారుల వేదిక ప్రదర్శనలు, తైక్వాండో విన్యాసాలు ప్రత్యేక ఆకర్షణగా నిలిచాయి. మరోవైపు భారతీయ శాస్త్రీయ నృత్య ప్రదర్శనలు, వయోలిన్ సంగీతం సాంస్కృతిక వైవిధ్యాన్ని చాటిచెప్పాయి.
కొరియన్ కళాకారులను చూసేందుకు వచ్చిన అభిమానులతో ప్రాంగణం సందడిగా మారింది. కళాకారులతో సెల్ఫీలు దిగేందుకు, వారిని దగ్గరగా చూసేందుకు యువత ఉత్సాహం చూపించింది. సంగీతం, నృత్యం, యుద్ధకళల ప్రదర్శనలు రెండు దేశాల సంస్కృతుల మధ్య ఉన్న అనుబంధాన్ని ప్రతిబింబించాయి.
కొరియన్ పాప్ సంస్కృతి, వినోద రంగంపై హైదరాబాద్ యువతలో పెరుగుతున్న ఆసక్తికి ఈ వేడుక అద్దం పట్టింది. భారతీయ సంప్రదాయ కళలకు, కొరియన్ సాంస్కృతిక అంశాలకు ఒకే వేదికపై చోటు కల్పించడం ఈ కార్యక్రమం ప్రత్యేకతగా నిలిచింది.
‘వన్ లైట్, టూ సిటీస్’ సందేశంతో నిర్వహించిన ఈ వేడుక భారత్‌–కొరియా ప్రజల మధ్య సాంస్కృతిక సంబంధాలను మరింత బలోపేతం చేసే వేదికగా నిలిచింది
