హైదరాబాద్: తెలుగు సినీ రంగంలో ప్రతిభను గౌరవించే ప్రతిష్టాత్మక “తెలంగాణ గద్దర్ ఫిల్మ్ అవార్డ్స్–2025” వేడుకలు ఘనంగా నిర్వహించబడ్డాయి. ఈ సందర్భంగా వివిధ విభాగాల్లో ఉత్తమ చిత్రాలు, నటీనటులు, సాంకేతిక నిపుణులకు అవార్డులు ప్రదానం చేశారు.
ప్రత్యేక పురస్కారాల్లో ఎన్టీఆర్ నేషనల్ ఫిల్మ్ అవార్డు డా. చిరంజీవికి, అక్కినేని నాగేశ్వరరావు అవార్డు జయసుధకు, పైడిజైరాజ్ అవార్డు కమల్ హాసన్కు ప్రదానం చేశారు. సినీ రంగానికి విశిష్ట సేవలందించిన పలువురికి ఈ అవార్డులు కేటాయించారు.
ఈ ఏడాది “Raju Weds Rambai” చిత్రం తొలి ఉత్తమ ఫీచర్ ఫిల్మ్గా ఎంపికై ప్రధాన ఆకర్షణగా నిలిచింది. నిర్మాత వేణు ఉడుగుల గోల్డ్ అవార్డు అందుకోగా, దర్శకుడు సాయిలు కాంపాటి సిల్వర్ అవార్డు అందుకున్నారు. హీరో అఖిల్ రాజ్, హీరోయిన్ తేజస్వి రావు బ్రాంజ్ అవార్డులు పొందారు.
రెండో ఉత్తమ చిత్రంగా “Dandora”, మూడో ఉత్తమ చిత్రంగా “The Great Pre Wedding Show” ఎంపికయ్యాయి. సామాజిక ఐక్యత అంశంపై “Thandel”, పర్యావరణ అంశంపై “EGWA” చిత్రాలు ప్రత్యేక గుర్తింపు పొందాయి.
వ్యక్తిగత విభాగాల్లో నాగ చైతన్య ఉత్తమ నటుడిగా, రష్మిక మందన్న ఉత్తమ నటిగా ఎంపికయ్యారు. దర్శకుడిగా సాయిలు కాంపాటి, సంగీత దర్శకుడిగా మార్క్ కె రాబిన్ అవార్డులు అందుకున్నారు.
ఈ వేడుకలో ముఖ్యమంత్రి రేవంత్ రెడ్డి మాట్లాడుతూ తెలంగాణ గద్దర్ ఫిల్మ్ అవార్డులను అందించడం తమ ప్రభుత్వ బాధ్యతగా భావిస్తున్నామని తెలిపారు. హైదరాబాద్ కేవలం ఐటీ హబ్, బిర్యానీకి మాత్రమే కాకుండా, సినీ పరిశ్రమకు కేరాఫ్ అడ్రస్గా నిలిచిందని అన్నారు. ఎన్టీఆర్, ఏఎన్నార్, రామానాయుడు, కృష్ణ వంటి మహానుభావులు సినీ రంగాన్ని ఉన్నత స్థాయికి తీసుకెళ్లారని పేర్కొన్నారు.
రామోజీ ఫిల్మ్ సిటీ ద్వారా హైదరాబాద్కు ప్రపంచస్థాయి గుర్తింపు వచ్చిందని, సినీ కార్మికుల కోసం ప్రభాకర్ రెడ్డి చేసిన సేవలు స్మరణీయమని అన్నారు. దాసరి నారాయణరావు వంటి ప్రముఖుల సేవలను గుర్తు చేసుకున్నారు.
హైదరాబాద్ను గ్లోబల్ సినీ హబ్గా అభివృద్ధి చేయడమే లక్ష్యంగా ప్రభుత్వం పనిచేస్తోందని, ఇటీవల నెట్ఫ్లిక్స్ సంస్థ హైదరాబాద్లో స్థాపన చేయడం గొప్ప విషయమని పేర్కొన్నారు. “నెట్ఫ్లిక్స్ రావడం అంటే హైదరాబాద్కు హాలీవుడ్ వచ్చినట్టే” అని వ్యాఖ్యానించారు.
గద్దర్ను ఒక చైతన్యంగా, స్ఫూర్తిగా పేర్కొన్న సీఎం, ఆయన పేరుతో అవార్డులు ఇవ్వడం గర్వకారణమన్నారు. సినిమా ఒక శక్తివంతమైన సాధనమని, సమాజంలో మార్పు తీసుకురావడానికి సినిమాను ఉపయోగించుకోవాలని పిలుపునిచ్చారు. గద్దర్ స్ఫూర్తితో సామాజిక సమస్యలపై సినిమాల ద్వారా సందేశం అందించాలని సినీ రంగానికి సూచించారు.
తెలుగు సినిమా అభివృద్ధి, కళాకారుల ప్రోత్సాహం లక్ష్యంగా నిర్వహిస్తున్న ఈ అవార్డులు, ఈ ఏడాది కూడా సినీ రంగంలో ప్రతిభను వెలుగులోకి తీసుకువచ్చాయి.
