రాష్ట్ర అప్పులు, గురుకుల టెండర్లపై కాంగ్రెస్–బీఆర్ఎస్ సవాళ్లు.. గన్‌పార్క్ వద్ద హైడ్రామా

హరీశ్ రావు, ఆర్‌ఎస్ ప్రవీణ్ కుమార్ సహా బీఆర్ఎస్ నేతల అరెస్ట్.. తెలంగాణ భవన్, గన్‌పార్క్ వద్ద భారీ పోలీసు బందోబస్తు

హైదరాబాద్, జూలై 2: తెలంగాణ రాజకీయాల్లో గురువారం తీవ్ర ఉత్కంఠ నెలకొంది. రాష్ట్ర అప్పుల భారం, గురుకుల రెసిడెన్షియల్ విద్యాసంస్థల టెండర్లలో అవకతవకల ఆరోపణలపై అధికార కాంగ్రెస్, ప్రతిపక్ష బీఆర్ఎస్ మధ్య గత కొద్ది రోజులుగా కొనసాగుతున్న సవాళ్లు–ప్రతిసవాళ్లు గన్‌పార్క్ వద్ద హైడ్రామాకు దారితీశాయి. బహిరంగ చర్చకు వెళ్తున్నామని ప్రకటించిన బీఆర్ఎస్ సీనియర్ నేతలు టీ. హరీశ్ రావు, వి. శ్రీనివాస్ గౌడ్, ఆర్‌ఎస్ ప్రవీణ్ కుమార్‌తో పాటు పలువురు నాయకులను పోలీసులు తెలంగాణ భవన్ ఎదుట అదుపులోకి తీసుకుని కంచన్‌బాగ్ పోలీస్ స్టేషన్‌కు తరలించారు. అనంతరం సాయంత్రం వారిని విడుదల చేశారు.

తెలంగాణ భవన్, గన్‌పార్క్, గాంధీభవన్ పరిసరాల్లో ఉదయం నుంచే భారీగా పోలీసులు మోహరించారు. కాంగ్రెస్, బీఆర్ఎస్ కార్యకర్తలు పెద్ద సంఖ్యలో అక్కడికి చేరుకోవడంతో ఉద్రిక్త పరిస్థితులు నెలకొన్నాయి. శాంతిభద్రతల దృష్ట్యా పోలీసులు పలువురు నేతలను ముందస్తుగా నిర్బంధించారు.

వివాదానికి కారణం ఇదే

గురుకుల రెసిడెన్షియల్ విద్యాసంస్థల టెండర్ల కేటాయింపులో భారీ అవకతవకలు జరిగాయని బీఆర్ఎస్ ఆరోపిస్తోంది. ఈ అంశంపై తమ వద్ద పూర్తి ఆధారాలు ఉన్నాయని మాజీ మంత్రి హరీశ్ రావు, బీఆర్ఎస్ వర్కింగ్ ప్రెసిడెంట్ కేటీఆర్ పలుమార్లు ప్రకటించారు. ఆరోపణలను నిరూపించాలని, లేకపోతే ప్రజలకు క్షమాపణ చెప్పాలని కాంగ్రెస్ మంత్రులు సవాల్ విసిరారు.

ఇదే సమయంలో రాష్ట్ర ఆర్థిక పరిస్థితి, అప్పుల అంశాన్ని తెరపైకి తీసుకొచ్చిన కాంగ్రెస్ ప్రభుత్వం, బీఆర్ఎస్ పదేళ్ల పాలనలో తెలంగాణను భారీ అప్పుల్లోకి నెట్టిందని ఆరోపించింది. ఈ అంశంపై మంత్రి జూపల్లి కృష్ణారావు కేటీఆర్‌కు బహిరంగ చర్చకు రావాలని సవాల్ విసిరారు. దీనికి స్పందించిన కేటీఆర్, రాష్ట్ర అప్పులు, ఆర్థిక నిర్వహణ, రైతు రుణమాఫీ, ఎన్నికల హామీలు, గురుకుల టెండర్లు సహా అన్ని అంశాలపై ప్రజల సమక్షంలో చర్చకు సిద్ధమని ప్రకటించారు.

తెలంగాణ భవన్‌లో కేటీఆర్… గన్‌పార్క్‌కు హరీశ్

గురువారం ఉదయం కేటీఆర్ తెలంగాణ భవన్‌కు చేరుకుని మంత్రి జూపల్లి కృష్ణారావు కోసం వేచి చూశారు. మరోవైపు హరీశ్ రావు, వి. శ్రీనివాస్ గౌడ్, ఆర్‌ఎస్ ప్రవీణ్ కుమార్ తదితర నేతలతో కలిసి గన్‌పార్క్‌లో జరగాల్సిన చర్చకు బయలుదేరారు. అయితే తెలంగాణ భవన్ వెలుపలే పోలీసులు వారిని అడ్డుకుని అదుపులోకి తీసుకున్నారు.

అరెస్టుకు ముందు మీడియాతో మాట్లాడిన హరీశ్ రావు, “మంత్రులే చర్చకు సవాల్ విసిరారు. మేము గొడవకు కాదు, చర్చకు వెళ్తున్నాం. మా వద్ద ఉన్న ఆధారాలను ప్రజల ముందు ఉంచేందుకు సిద్ధంగా ఉన్నాం. మరి పోలీసులు ఎందుకు అడ్డుకుంటున్నారు?” అంటూ ప్రశ్నించారు. మంత్రి పొన్నం ప్రభాకర్, అడ్లూరి లక్ష్మణ్, మహ్మద్ అజారుద్దీన్‌లకు ఫోన్ చేసినా స్పందించలేదని ఆరోపించారు.

గన్‌పార్క్‌కు కాంగ్రెస్ మంత్రులు

ఇదిలా ఉండగా మంత్రులు పొన్నం ప్రభాకర్, అడ్లూరి లక్ష్మణ్ కుమార్, మహ్మద్ అజారుద్దీన్ గన్‌పార్క్‌కు చేరుకుని బీఆర్ఎస్ నాయకులు చర్చకు రాలేదని విమర్శించారు. అనంతరం మంత్రి జూపల్లి కృష్ణారావు కూడా అక్కడికి చేరుకుని కేటీఆర్, హరీశ్ రావు ఇద్దరూ కలిసి వస్తే ఒకేసారి సమాధానం చెబుతానని వ్యాఖ్యానించారు. రాష్ట్ర అప్పులు, గురుకుల టెండర్లు మాత్రమే కాకుండా అన్ని అంశాలపై బహిరంగ చర్చకు కాంగ్రెస్ సిద్ధంగా ఉందన్నారు.

మాటల యుద్ధం మరింత ముదురు

బీఆర్ఎస్ నేతల అరెస్టులు, కాంగ్రెస్ మంత్రుల ప్రతిస్పందనలతో ఇరు పార్టీల మధ్య మాటల యుద్ధం మరింత తీవ్రమైంది. బహిరంగ చర్చ పేరుతో మొదలైన రాజకీయ సవాళ్లు చివరకు అరెస్టులు, పరస్పర ఆరోపణలతో ముగిశాయి. రాష్ట్ర అప్పులు, గురుకుల టెండర్ల వ్యవహారం రానున్న రోజుల్లో తెలంగాణ రాజకీయాల్లో ప్రధాన చర్చనీయాంశంగా మారే అవకాశాలు కనిపిస్తున్నాయి.