హైదరాబాద్: నగరంలోని నెహ్రూ జూలాజికల్ పార్క్లో గత కొన్ని నెలలుగా జంతు శిశువుల జననాలు భారీగా నమోదవుతున్నాయి. వివిధ జాతులకు చెందిన 50కిపైగా కొత్త జంతు శిశువులు జన్మించడంతో జూలో సందడి నెలకొంది. ముఖ్యంగా ఆరు సింహపు పిల్లలు జన్మించడం ఇటీవల కాలంలో అత్యంత విశేషమైన పరిణామంగా అధికారులు పేర్కొంటున్నారు.
కొత్తగా జన్మించిన సింహపు పిల్లల్లో మూడు ఆఫ్రికన్ సింహాలు, మూడు ఆసియాటిక్ సింహాలు ఉన్నాయి. ఆఫ్రికన్ సింహపు పిల్లలు ప్రస్తుతం ఒక నెల వయస్సులో ఉండగా, ఆసియాటిక్ సింహపు పిల్లలు రెండు నెలల వయస్సుకు చేరుకున్నాయి. ఇవన్నీ ఆరోగ్యంగా, చురుకుగా ఉన్నాయని, జూ పశువైద్య బృందం నిరంతరం పర్యవేక్షిస్తోందని అధికారులు తెలిపారు.
ప్రస్తుతం హైదరాబాద్ జూలో మొత్తం 17 సింహాలు ఉన్నాయి. వాటిలో 5 ఆఫ్రికన్ సింహాలు, 12 ఆసియాటిక్ సింహాలు ఉన్నాయి. కొత్తగా పుట్టిన ఆరు పిల్లలతో సింహాల కుటుంబం మరింత విస్తరించనుంది.
జన్యుపరమైన వైవిధ్యాన్ని (Genetic Diversity) కాపాడేందుకు దేశంలోని ఇతర జూలతో జంతువుల పరస్పర మార్పిడి (Animal Exchange Programme) ద్వారా సింహాల సంతానోత్పత్తి కార్యక్రమాన్ని నిర్వహిస్తున్నట్లు అధికారులు వెల్లడించారు. గతంలో అంతర్గత సంతానోత్పత్తి (Inbreeding) కారణంగా కొన్ని సింహాలకు వెనుక కాళ్ల సమస్యలు తలెత్తిన నేపథ్యంలో ఈ చర్యలు మంచి ఫలితాలు ఇస్తున్నాయని తెలిపారు.
సింహాలకే పరిమితం కాకుండా రెండు బెంగాల్ పులి పిల్లలు కూడా ఇటీవల జన్మించాయి. ప్రస్తుతం జూలో 10 బెంగాల్ పులులు, 10 వైట్ టైగర్లు ఉన్నాయి.
ఇక ఇతర జాతుల్లో కూడా సంతానోత్పత్తి ఆశాజనకంగా కొనసాగుతోంది. ఈ సీజన్లో తొమ్మిది మౌస్ డీర్ పిల్లలు, ఐదు బ్లాక్బక్ పిల్లలు, నాలుగు ఆస్ట్రిచ్ పిల్లలు, మూడు నక్క పిల్లలు, రెండు హాగ్ డీర్ పిల్లలు, రెండు గోల్డెన్ ఫీజెంట్ పిల్లలు, అలాగే ఒక్కో చౌసింఘా (నాలుగు కొమ్ముల జింక), ఒక సాంబార్ జింక పిల్ల జన్మించాయి.
మౌస్ డీర్ జాతి సంరక్షణలో హైదరాబాద్ జూ రెండు దశాబ్దాలుగా విజయవంతంగా పనిచేస్తోందని అధికారులు తెలిపారు. జంతు సంరక్షణ, బ్రీడింగ్ కార్యక్రమాలతో పాటు పరిశోధనలను కూడా అంతర్జాతీయ ప్రమాణాలున్న శాస్త్రీయ జర్నళ్లలో ప్రచురిస్తున్నామని తెలంగాణ జూ పార్కుల డైరెక్టర్ డాక్టర్ సునీల్ ఎస్. హిరేమత్ వెల్లడించారు.
ప్రస్తుతం నెహ్రూ జూలాజికల్ పార్క్లో మొత్తం 2,178 జంతువులు ఉన్నాయి. వీటిలో 498 క్షీరదాలు, 1,352 పక్షులు, 320 సరీసృపాలు, 8 ఉభయచరాలు ఉన్నట్లు జూ అధికారులు తెలిపారు. జంతు సంరక్షణ, శాస్త్రీయ బ్రీడింగ్ కార్యక్రమాల ఫలితంగానే ఈ సంతానోత్పత్తి విజయాలు సాధ్యమయ్యాయని వారు పేర్కొన్నారు.
