హైదరాబాద్: నగరంలో కలుషిత ఆహార పదార్థాల తయారీపై టాస్క్ఫోర్స్ అధికారులు మరో కీలక దాడి నిర్వహించారు. మైలార్దేవ్పల్లి పోలీస్ స్టేషన్ పరిధిలోని కట్టెదాన్ పారిశ్రామిక ప్రాంతంలో నాసిరకం అల్లం–వెల్లుల్లి పేస్ట్ తయారు చేసి విక్రయిస్తున్న యూనిట్ను కమిషనర్ టాస్క్ఫోర్స్ (ఖైరతాబాద్ జోన్) మరియు హెచ్-ఫాస్ట్ బృందం సంయుక్తంగా ఛేదించాయి. ఈ ఘటనలో హసన్ అలీ రూపానీ (55) అనే వ్యక్తిని అరెస్ట్ చేశారు.
నమ్మదగిన సమాచారం మేరకు, పోలీసులు ‘SKR ఫుడ్ ప్రొడక్ట్స్’ (ప్లాట్ నెం. 25, SEIE, ఐడిఏ కట్టెదాన్) పై ఆకస్మికంగా దాడి నిర్వహించారు. ఈ తనిఖీల్లో యూనిట్ను నిర్వహిస్తున్న హసన్ అలీ రూపానీని అదుపులోకి తీసుకున్నారు. అతను అబిడ్స్ ప్రాంతానికి చెందినవాడిగా గుర్తించారు.
తనిఖీల్లో భాగంగా, అత్యంత అపరిశుభ్రమైన వాతావరణంలో ప్లాస్టిక్ డబ్బాల్లో అల్లం–వెల్లుల్లి పేస్ట్ తయారు చేస్తున్నట్లు బయటపడింది. నాణ్యత లేని అల్లం, వెల్లుల్లి తొక్కలు వంటి ముడి సరుకులను వినియోగిస్తూ పేస్ట్ను తయారు చేస్తున్నారని అధికారులు తెలిపారు. అలాగే పేస్ట్ తయారీలో ఎసిటిక్ యాసిడ్, గ్జాంతమ్ గమ్ పౌడర్ వంటి రసాయనాలను కలుపుతున్నట్లు గుర్తించారు.
ఈ పేస్ట్ను బహిరంగ ప్రదేశాల్లో ఉంచడం వల్ల దుమ్ము, ఈగలు వాలుతున్నాయని, ఆ తర్వాత వాటిని హోల్సేల్ కిరాణా దుకాణాలు మరియు క్యాటరింగ్ సర్వీసులకు సరఫరా చేస్తున్నట్లు పోలీసులు వెల్లడించారు. ఈ విధంగా ప్రజల ఆరోగ్యాన్ని ప్రమాదంలోకి నెడుతూ అక్రమంగా వ్యాపారం కొనసాగిస్తున్నట్లు తెలిపారు.
ఈ దాడిలో సుమారు రూ. 22 లక్షల విలువైన సరుకులను అధికారులు స్వాధీనం చేసుకున్నారు. అందులో 4,032 కిలోల అల్లం–వెల్లుల్లి పేస్ట్, 6,000 కిలోల నాణ్యత లేని వెల్లుల్లి, 210 కిలోల అల్లం, వెల్లుల్లి తొక్కలు, 250 కిలోల ఉప్పు, ఎసిటిక్ యాసిడ్, గ్జాంతమ్ గమ్ పౌడర్ మరియు ఐదు గ్రైండింగ్ యంత్రాలు ఉన్నాయి.
ఆహార భద్రతా ప్రమాణాల సర్టిఫికేట్ లేకుండా కేవలం లాభాపేక్షతో ఈ అక్రమ వ్యాపారం నిర్వహిస్తున్నట్లు అధికారులు పేర్కొన్నారు. అరెస్టయిన నిందితుడిని, స్వాధీనం చేసుకున్న సామాగ్రిని తదుపరి చర్యల కోసం మైలార్దేవ్పల్లి పోలీస్ స్టేషన్ ఎస్హెచ్ఓకు అప్పగించారు.
ఈ ఆపరేషన్లో ఖైరతాబాద్ టాస్క్ఫోర్స్ ఇన్స్పెక్టర్ పి. రాఘవేందర్, ఎస్సై శ్రీకాంత్, మైలార్దేవ్పల్లి ఎస్సై విశ్వనాథ్ రెడ్డి తదితరులు పాల్గొన్నారు. ఈ వివరాలను టాస్క్ఫోర్స్ డిప్యూటీ కమిషనర్ ఆఫ్ పోలీస్ వైభవ్ గైక్వాడ్ రఘునాథ్ (IPS) వెల్లడించారు.
