ఆహార కల్తీపై వంద రోజుల పోరు.. ఇక లక్ష్యం ‘ఫుడ్ సేఫ్ హైదరాబాద్’

– 185 కేసులు నమోదు.. 121.87 టన్నుల కల్తీ, నాణ్యతలేని ఆహార పదార్థాల స్వాధీనం
– 247 కేసులు ఫుడ్ సేఫ్టీ అధికారులకు బదిలీ
– దాడులతోనే కాదు.. శాశ్వత నియంత్రణకు సమగ్ర కార్యాచరణ అవసరం

హైదరాబాద్, జూలై 4 (ప్రత్యేక ప్రతినిధి):
నగరంలో ఆహార కల్తీ మాఫియాపై హైదరాబాద్ సిటీ పోలీసుల ప్రత్యేక విభాగం హైదరాబాద్ ఫుడ్ అడల్టరేషన్ సర్వైలెన్స్ టీమ్ (హెచ్-ఫాస్ట్) ప్రారంభించిన యుద్ధం వంద రోజులు పూర్తి చేసుకుంది. ఈ ఏడాది మార్చి 19న ఏర్పాటైన ఈ ప్రత్యేక బృందం జీహెచ్‌ఎంసీ, ఫుడ్ సేఫ్టీ, వెటర్నరీ శాఖలతో సమన్వయంగా పనిచేస్తూ నగరవ్యాప్తంగా విస్తృత తనిఖీలు నిర్వహించింది. ఈ కాలంలో 185 కేసులు నమోదు చేసి, 121.87 టన్నుల కల్తీ, నాణ్యతలేని ఆహార పదార్థాలను స్వాధీనం చేసుకోవడం ద్వారా కల్తీ వ్యాపారులపై గట్టి దెబ్బ కొట్టింది.

టాస్క్ ఫోర్స్ డీసీపీ ఆధ్వర్యంలో 36 మంది అధికారులు, సిబ్బందితో పనిచేస్తున్న హెచ్-ఫాస్ట్ ఇప్పటివరకు అల్లం-వెల్లుల్లి పేస్ట్, పనీర్, కోవా, నెయ్యి, పెరుగు, టీ పొడి, డ్రై ఫ్రూట్స్, రసాయనాలతో మగ్గించిన పండ్లు, నాణ్యతలేని మాంసం, చికెన్ వ్యర్థాలు, ఐస్‌క్రీమ్‌లు, బేకరీ ఉత్పత్తులు, ఆర్‌ఓ నీటి ప్లాంట్లపై వరుసగా దాడులు నిర్వహించింది. ఈ దాడుల్లో భారీ మొత్తంలో కల్తీ ఉత్పత్తులను స్వాధీనం చేసుకోవడంతో పాటు వందలాది మందిపై కేసులు నమోదు చేసింది.

అంతేకాదు, తదుపరి చట్టపరమైన చర్యల కోసం 247 కేసులను జీహెచ్‌ఎంసీ ఫుడ్ సేఫ్టీ విభాగానికి బదిలీ చేసింది. ప్రజల నుంచి వచ్చిన ఫిర్యాదులపై కూడా వేగంగా స్పందించడం ద్వారా కల్తీ ఆహారంపై అవగాహన పెంచడంలో హెచ్-ఫాస్ట్ కీలక పాత్ర పోషించింది.

మొదటి అడుగు విజయవంతమే… అసలు పరీక్ష ఇప్పుడే

వంద రోజుల్లో నమోదైన కేసులు, స్వాధీనం చేసుకున్న ఆహార పదార్థాల పరిమాణం చూస్తే హెచ్-ఫాస్ట్ పనితీరు ఆశాజనకంగానే కనిపిస్తోంది. అయితే నిపుణుల అభిప్రాయం ప్రకారం ఇది కల్తీ వ్యాపారంపై మొదటి దెబ్బ మాత్రమే. హైదరాబాద్ వంటి మహానగరంలో వేలాది హోటళ్లు, రెస్టారెంట్లు, బేకరీలు, స్వీట్ షాపులు, మాంసం దుకాణాలు, ఆన్‌లైన్ ఫుడ్ కిచెన్లు, స్ట్రీట్ ఫుడ్ కేంద్రాలు పనిచేస్తున్న నేపథ్యంలో కేవలం దాడులతో సమస్యకు శాశ్వత పరిష్కారం లభించదు.

నగరంలో ప్రతిరోజూ లక్షలాది మంది బయట ఆహారం తీసుకుంటున్నారు. ఐటీ కారిడార్ నుంచి పాతబస్తీ వరకు, చిన్న బండిపై అమ్మే చాట్ నుంచి స్టార్ హోటళ్ల వరకు విస్తరించిన ఆహార వ్యాపారంపై నిరంతర నిఘా అవసరమని ఆహార భద్రత నిపుణులు సూచిస్తున్నారు.

స్ట్రీట్ ఫుడ్ జోన్లే తదుపరి సవాల్

హైదరాబాద్‌కు స్ట్రీట్ ఫుడ్ ప్రత్యేక గుర్తింపు. మాదాపూర్, గచ్చిబౌలి, కొండాపూర్, కూకట్‌పల్లి, అమీర్‌పేట్, దిల్‌సుఖ్‌నగర్, చార్మినార్, నెక్లెస్ రోడ్, ట్యాంక్‌బండ్, మోజంజాహి మార్కెట్, బేగంబజార్ వంటి ప్రాంతాల్లో ప్రతిరోజూ వేలాది మంది ఆహారం తీసుకుంటున్నారు. ఈ ప్రాంతాల్లో పరిశుభ్రత, నిల్వ విధానాలు, వాడే నూనెలు, నీటి నాణ్యత, మాంసం నిల్వ వంటి అంశాలపై ప్రత్యేక నిఘా లేకుంటే కల్తీని పూర్తిగా అరికట్టడం కష్టమే.

హెచ్-ఫాస్ట్ ముందున్న అసలు లక్ష్యం

హెచ్-ఫాస్ట్ ఇకపై దాడులతో పాటు వ్యవస్థను మార్చే దిశగా అడుగులు వేయాల్సిన అవసరం ఉందని నిపుణులు సూచిస్తున్నారు.

ప్రతి స్ట్రీట్ ఫుడ్ జోన్‌కు ప్రత్యేక తనిఖీ బృందాలు, మొబైల్ ఫుడ్ టెస్టింగ్ ల్యాబ్‌లు, హోటళ్లకు పరిశుభ్రత రేటింగ్ వ్యవస్థ, డిజిటల్ ఫిర్యాదు వేదిక, ఆహార సరఫరా గొలుసుపై నిఘా, తరచూ నేరాలకు పాల్పడే వ్యాపారులపై పీడీ యాక్ట్ వంటి కఠిన చర్యలు అమలు చేయాల్సిన అవసరం ఉంది. అదే సమయంలో ఫుడ్ బిజినెస్ ఆపరేటర్లకు శిక్షణ, వినియోగదారుల్లో అవగాహన కార్యక్రమాలు కూడా సమాంతరంగా నిర్వహించాలి.

కేసులు కాదు… ప్రాణాలు కాపాడటమే విజయం

ఆహార కల్తీ వల్ల కిడ్నీ, కాలేయం, గుండె సంబంధిత వ్యాధులు, క్యాన్సర్, చిన్నారుల్లో ఎదుగుదల సమస్యలు పెరుగుతున్నాయని వైద్యులు హెచ్చరిస్తున్నారు. అందువల్ల హెచ్-ఫాస్ట్ విజయాన్ని కేవలం నమోదైన కేసులు లేదా స్వాధీనం చేసుకున్న టన్నుల ఆహారంతో కాకుండా కల్తీ ఘటనలు తగ్గడం, ప్రజలకు సురక్షిత ఆహారం అందుబాటులోకి రావడం, ఆస్పత్రుల్లో ఫుడ్ పాయిజనింగ్ కేసులు తగ్గడం, వ్యాపారుల్లో బాధ్యత పెరగడం వంటి ఫలితాల ఆధారంగా కొలవాల్సి ఉంటుంది.

వంద రోజుల ప్రయాణంలో హెచ్-ఫాస్ట్ బలమైన ప్రారంభాన్ని నమోదు చేసింది. అయితే ‘కల్తీ రహిత హైదరాబాద్’ లక్ష్యాన్ని చేరుకోవాలంటే నిరంతర నిఘా, కఠిన చట్ట అమలు, సాంకేతిక పరిజ్ఞానం వినియోగం, ప్రజల భాగస్వామ్యం అనే నాలుగు స్తంభాలపై ముందుకు సాగాల్సిన అవసరం ఉందని నిపుణులు అభిప్రాయపడుతున్నారు.